மாட்ரிட் ஓபன்: 4-ஆவது சுற்றில் பென்சிச், குவிட்டோவா
ஸ்பெயினில் நடைபெறும் மாட்ரிட் ஓபன் டென்னிஸின் மகளிர் பிரிவு 3-ஆவது சுற்றில் ஸ்விட்சர்லாந்தின் பெலின்டா பென்சிச், செக் குடியரசின் பெட்ரா குவிட்டோவா ஆகியோர் வெற்றி பெற்றனர். போட்டித்தரவரிசையில் 8-ஆம் இடத்திலிருக்கும் பென்சிச், டுனீசியாவின் ஆன்ஸ் ஜாபுயேருக்கு எதிரான ஆட்டத்தில் 7-6 (7/2), 4-3 என்ற செட்களில் முன்னிலையில் இருந்தபோது, ஜாபுயேர் போட்டியிலிருந்து விலகுவதாக தெரிவித்தார். இதையடுத்து பென்சிச் வென்றதாக அறிவிக்கப்பட்டார். மற்றொரு ஆட்டத்தில் ரஷியாவின் வெரோனிகா குதர்மெடோவாவை எதிர்கொண்டார், போட்டித்தரவரிசையில் 9-ஆவது இடத்திலிருக்கும் பெட்ரா குவிட்டோவா. 2 மணி நேரம் நடைபெற்ற இந்த ஆட்டத்தின் முடிவில் குவிட்டோவா 6-3, 4-6, 6-4 என்ற செட்களில் வென்றார்.
மாட்ரிட் ஓபன் டென்னிஸ் போட்டியில் ஆடவர் பிரிவில் தென் ஆப்பிரிக்காவின் லாய்ட் ஹாரிஸ், ரஷியாவின் அஸ்லான் கராட்சேவ் ஆகியோர் 2-ஆவது சுற்றுக்கு முன்னேறினர். இதில் ஹாரிஸ் தனது முதல் சுற்றில் 6-3, 3-6, 7-6 (7/5) என்ற செட்களில் போட்டித்தரவரிசையில் 13-ஆவது இடத்திலிருந்த பல்கேரியாவின் கிரிகோர் டிமிட்ரோவை வீழ்த்தினார். அஸ்லான் கராட்சேவ் 7-5, 6-4 என்ற செட்களில் பிரான்ஸின் யூகோ ஹம்பர்ட்டை வென்றார்.
அஸ்லான் தனது அடுத்த சுற்றில், போட்டித்தரவரிசையில் 7-ஆம் இடத்திலிருக்கும் ஆர்ஜென்டீனாவின் டியேகோ ஷ்வார்ட்ஸ்மேனை எதிர்கொள்கிறார். இதர சுற்றுகளில் அமெரிக்காவின் ஜான் இஸ்னர் 6-4, 7-6 (8/6) என்ற செட்களில் செர்பியாவின் மியோமிர் கெச்மனோவிச்சை தோற்கடித்தார். இங்கிலாந்தின் டேன் இவான்ஸ் 7-6 (8/6), 6-7 (7/9), 6-2 என்ற செட்களில் பிரான்ஸின் ஜெரிமி சார்டியை வீழ்த்தினார். ர்மனியின் டொமினிக் கோப்ஃபர் 6-4, 6-4 என்ற செட்களில் அமெரிக்காவின் ரைலி ஒபெல்காவை வெற்றி கண்டார். ஸ்பெயினின் தகுதிச்சுற்று வீரர் கார்லோஸ் அல்கராஸ் கார்ஃபியா 6-4, 6-0 என்ற செட்களில் பிரான்ஸின் அட்ரியான் மன்னாரினோவை வென்றார்.
Tags :
