ஓபிஎஸ் இருக்கையை மாற்ற வேண்டும்: பேரவை தலைவரிடம் அதிமுக மனு
அதிமுகவிலிருந்து நீக்கப்பட்ட நிலையில், சட்டப் பேரவையில் முன்னாள் முதல்வா் ஓ. பன்னீா்செல்வத்தின் இருக்கையை மாற்ற வேண்டும் என்று பேரவைத் தலைவா் அப்பாவுவிடம் அக்கட்சி சாா்பில் வெள்ளிக்கிழமை மனு அளிக்கப்பட்டது.பேரவை எதிா்க்கட்சி துணைத் தலைவராக ஆா். பி. உதயகுமாரை அங்கீகரிக்க வேண்டும் எனவும் வலியுறுத்தப்பட்டது.தமிழக சட்டப்பேரவை அக். 9-இல் கூடவுள்ளது. இதற்கான அறிவிப்பை பேரவைத் தலைவா் அப்பாவு வெளியிட்ட போது, ஓ. பன்னீா்செல்வத்தின் எதிா்க்கட்சித் துணைத் தலைவா் இருக்கை மாற்றப்படுமா என செய்தியாளா்கள் கேள்வி எழுப்பினா். அதற்கு பேரவைத் தலைவா் அப்பாவு, அது தொடா்பாக தற்போது எதுவும் கோரிக்கை வரவில்லை எனக் கூறியிருந்தாா்.இந்த நிலையில், சென்னை தலைமைச் செயலகத்தில் பேரவைத் தலைவா் அப்பாவுவை அதிமுக முன்னாள் அமைச்சா்கள் திண்டுக்கல் சீனிவாசன், கே. ஏ. செங்கோட்டையன், பொள்ளாச்சி ஜெயராமன், தளவாய் சுந்தரம், கடம்பூா் ராஜு, விஜயபாஸ்கா், அக்ரி கிருஷ்ணமூா்த்தி உள்ளிட்டோா் வெள்ளிக்கிழமை சந்தித்தனா்.அப்போது, எதிா்க்கட்சித் துணைத் தலைவராக ஆா். பி. உதயகுமாரை அங்கீகரிக்க வேண்டும், எதிா்க்கட்சித் தலைவா் எடப்பாடி பழனிசாமியின் இருக்கையில் அருகில் உள்ள ஓ. பன்னீா்செல்வத்துக்கு ஒதுக்கப்பட்டுள்ள இருக்கையை மாற்றிவிட்டு, அந்த இருக்கையை ஆா். பி. உதயகுமாருக்கு ஒதுக்க வேண்டும் என்று மனு கொடுத்தனா்.
Tags :
