லாரியும் லோடு ஆட்டோவும் நேருக்கு நேர் மோதிக்கொண்ட விபத்தில் இருவர் பலி.
தூத்துக்குடி மாவட்டம் குலசேகரன்பட்டிணம் முத்தாரம்மன் கோவிலில் தசரா திருவிழா கொடியேற்றத்துடன் தொடங்கியது. இதனை முன்னிட்டு புதுக்கோட்டை அருகிலுள்ள கீழசெக்காரக்குடி பகுதியை சேர்ந்த முப்பெரும் தேவி தசரா குழுவை சேர்ந்த 70 பேர், இரண்டு வேன் மற்றும் லோடு ஆட்டோ வாகனங்களில் குலசேகரப் பட்டிணம் முத்தாரம்மன் கோவிலுக்கு வந்து காப்பு கட்டிக்கொண்டு ஊர் திரும்பியுள்ளனர். அப்போது கல்லாமொழி அருகே வந்தபோது எதிரே வந்த லாரியும் பக்தர்கள் சென்ற லோடு ஆட்டோவும் நேருக்கு நேர் பயங்கரமாக மோதி விபத்துக்குள்ளாகியது. இதில் 13-பேர் பலத்த காயமடைந்தனர். இதனைடுத்து அவ்வழியே வந்தவர்கள் உடனடியாக அவர்களை மீட்டு 108 ஆம்புலன்ஸ் மூலம் திருச்செந்தூர் அரசு மருத்துவமனைக்கு அனுப்பிவைத்தனர். அங்கு முதலுதவி சிகிச்சை அளித்து பலத்த காயமடைந்த 9 பேர்களை மேல் சிகிச்சைக்காக தூத்துக்குடி அரசு மருத்துவக்கல்லூரி மருத்துவமனைக்கு அனுப்பிவைத்தனர். இதில் பலத்த காயம் அடைந்த பெரும்படையான், கிருஷ்ண பெருமாள், இருவரும் சிகிச்சை பலனின்றி உயிரிழந்தனர் மற்றவர்களில் மூன்று பேர் மிகவும் ஆபத்தான நிலையில் சிகிச்சை பெற்று வருகின்றனர். தசரா திருவிழாவை ஒட்டி விரதம் இருப்பதற்காக கோவிலுக்கு சென்று விட்டு வரும்போது ஏற்பட்ட விபத்தில் தசரா குழுக்களைச் சேர்ந்த இரண்டு பக்தர்கள் உயிரிழந்த சம்பவம் பெரும் சோகத்தை ஏற்படுத்தியுள்ளது.
Tags : லாரியும் லோடு ஆட்டோவும் நேருக்கு நேர் மோதிக்கொண்ட விபத்தில் இருவர் பலி.
