2026 தேர்தலுக்கு பிறகுதான் விஜய்க்கு என்ன பலம் இருக்கிறது என்பது தெரியும் -சிபிஎம் மாநில செயலாளர் பெ.சண்முகம்.
தூத்துக்குடி மாவட்டம் கோவில்பட்டியில் சிபிஎம் மாநில செயலாளர் பெ.சண்முகம், செய்தியாளர்களுக்கு அளித்த பேட்டி: வடமாநிலங்களில் பெய்த பலத்த மழையினால் அங்குள்ள மக்கள் கடுமையாக பாதிக்கப்பட்டுள்ளனர்.தமிழ்நாட்டில் வழக்கத்தைவிட 30 சதவீதம் அதிக மழை பெய்யும் என வானிலை ஆய்வாளர்கள் தெரிவித்துள்ளனர். தமிழக அரசு இப்போதே முன்னெச்சரிக்கை நடவடிக்கைகளை மேற்கொள்ள வேண்டும். ஒவ்வொரு மாவட்டங்கள் மற்றும் நகரங்களில் அனைத்துக் கட்சி கூட்டத்தைக் கூட்டி, அரசியல் கட்சியினர் சொல்லும் ஆலோசனைகளைப் பெற்று,தேவையான அனைத்து நடவடிக்கைகளையும் தமிழக அரசு மேற்கொள்ள வேண்டும்.
தமிழகத்தில் தற்போது போக்குவரத்து, மின்சாரம் உள்ளிட்ட பல்வேறு துறைகளில் பணியாற்ற, அந்தந்த துறைகள் மூலமாகவோ, அல்லது அரசுப் பணியாளர் தேர்வாணையத்தின் மூலமாகவோ தேர்வுகள் நடத்தப்பட்டு ஊழியர்கள் தேர்ந்தெடுக்கப்படும் நிலை உள்ளது
இந்நிலையில் தற்போது, தமிழ்நாடு அரசு, ஓவர்சீஸ் மேன்பவர் கார்ப்பரேஷன் லிமிடெட் என்கிற ஒரு கம்பெனியை துவக்கி இருக்கிறார்கள். போக்குவரத்து, மின்சாரம் உள்பட பல துறைகளுக்கு இனிமேல் இதன் மூலமாகத்தான் ஊழியர்கள் பணியமர்த்தப்படவுள்ளார்கள்.
நிரந்தரப் பணியிடங்களுக்கு ஒப்பந்தம் அடிப்படையில் ஊழியர்களை நியமனம் செய்வதுதான் இந்த கம்பெனியை துவங்கியதற்கான முக்கிய நோக்கம். தமிழ்நாடு அரசு இப்படி செய்தால், அரசு மற்றும் பொதுத்துறை நிறுவனங்களில் இடஒதுக்கீடு என்பதே இல்லாமல் போய்விடும். எந்த ஒரு ஊழியருக்கும் பணி பாதுகாப்பு இருக்காது.
நிரந்தரப் பணியிடங்களுக்கு ஒப்பந்த அடிப்படையில் ஊழியர்களை நியமனம் செய்வது என்ற தமிழ்நாடு அரசின் ஊழியர் விரோதக் கொள்கையை மார்க்சிஸ்ட் கம்யூனிஸ்ட் கட்சி ஏற்கவில்லை. வன்மையான கண்டனத்தை தெரிவிக்கிறோம்.
ஏற்கெனவே உள்ள நடைமுறைப்படி, அந்தந்த துறைகள் மூலமாகவோ, அரசுப் பணியாளர் தேர்வாணையத்தின் மூலமாகவோ தேர்வு நடத்தப்பட்டு, தகுதி உள்ளவர்களுக்கு நிரந்தரப் பணி வழங்கப்பட வேண்டும்.
364 வாக்குறுதிகளை நிறைவேற்றி இருக்கிறோம், 46 வாக்குறுதிகள் பரிசீலனையில் உள்ளன, எஞ்சிய சுமார் 100 வாக்குறுதிகளை நிறைவேற்ற முடியாமல் இருப்பதற்கு மத்திய அரசு போதிய நிதி ஒதுக்காததுதான் காரணம் என, கரூரில் நடந்த முப்பெரும் விழாவில் முதல்வர் மு.க.ஸ்டாலின் தெரிவித்துள்ளார்.
மத்திய அரசு, தமிழகத்திற்கு கொடுக்க வேண்டிய நிதியில் பாரபட்சம் காட்டுவதாலும், உள்ளாட்சி அமைப்புகளை போதுமான நிதி தராததாலும் தமிழகம் பாதிக்கப்பட்டுள்ளது என்பதில் மாற்றுக்கருத்து கிடையாது. பாஜ., ஆளும் கட்சியாக இல்லாத மாநிலங்களில், மத்திய பாஜ., அரசு நிதி ஒதுக்கீடு செய்வதில் தொடர்ந்து பாரபட்சம் காட்டிவருகிறது. தமிழகத்தைப் போலவே கேரள மாநிலமும் மத்திய அரசின் இத்தகைய செயலால் கடுமையாக பாதிக்கப்பட்டுள்ளது.
திமுக., அரசு சொல்லாத பல திட்டங்களையும் நிறைவேற்றியுள்ளது. தாய், தந்தைகளை இழந்த குழந்தைகளுக்கு மாதந்தோறும் ரூ.2 ஆயிரம் வழங்கும் அன்புக்கரங்கள் என்ற திட்டம் சமீபத்தில் நடைமுறைப்படுத்தப்பட்டு, மக்கள் மத்தியில் பெரும் வரவேற்பை பெற்று வருகிறது. இதுபோன்று, தேர்தல் வாக்குறுதிகளில் சொல்லாத பல திட்டங்களையும் திமுக., அரசு நிறைவேற்றியுள்ளது. அது வரவேற்கத்தக்கது. அதே நேரத்தில், நிறைவேற்றப்படாத வாக்குறுதிகள் குறித்து பொதுமக்களுக்கு பதிலளிக்க வேண்டிய பொறுப்பு திமுக., அரசுக்கு உள்ளது.
காஞ்சிபுரத்தில், வன்கொடுமை தடுப்பு வழக்கில் குற்றம்சாட்டப்பட்டவர்களை கைது செய்ய தவறியதால், டி.எஸ்.பி., சங்கர் கணேஷை கைது செய்ய மாவட்ட முதன்மை நீதிமன்றம் உத்தரவிட்டது. திருப்புவனம் அஜித்குமார் கொலை வழக்கு போன்ற பல சம்பவங்களில் நீதிமன்றத்தின் கண்டனங்களுக்கு காவல்துறை ஆளாகியிருக்கிறது.
காவல்துறை சரியாக செயல்படாமல் போன நேரங்களில் எல்லாம் மார்க்சிஸ்ட் கம்யூனிஸ்ட் கட்சி அதனை வன்மையாக கண்டித்திருக்கிறது. வன்கொடுமை தடுப்புச் சட்டம் அமலாக்கம் தொடர்பாக காவல் துறை அதிகாரிகள் சிலர் சரியான புரிதல் இல்லாமல் இருக்கிறார்கள். அவர்களுக்கு போதுமான பயிற்சியளிக்க வேண்டும். பல சந்தர்ப்பங்களில் காவல்துறை அதிகாரிகள் சட்டத்திற்கு புறம்பாக செயல்படுகிறார்கள். ஆகவே, காவல்துறையினரின் செயல்பாடுகளில் நிச்சயம் மாற்றம் தேவை.
தவெக தலைவர் விஜய் பிரசாரத்தை இப்போதுதான் தொடங்கி இருக்கிறார். பிரசாரத்திற்கு வரும் கூட்டம் அனைத்தும் வாக்குகளாக மாறுமா என்பது மிகப்பெரிய கேள்வி. ஒரு வெற்றிகரமான நடிகரை பார்க்க கூட்டம் கூடும் என்பது இயல்பான ஒன்று. விஜயகாந்த், கமலஹாசன் போன்றோர் கட்சி ஆரம்பித்தபோதும் அதிகமான கூட்டம் கூடியது. ஆனால் காலப்போக்கில் அந்த கூட்டம் எங்கே போனது என்பதே தெரியாமல் போய்விட்டது. ஆகவே, 2026 தேர்தல் முடிவுக்கு பிறகுதான் விஜய்க்கு என்ன பலம் இருக்கிறது என்பது தெரியும்.
கோவில்பட்டியில் (செப்.20) நடக்கும் தீப்பெட்டித் தொழில் நூற்றாண்டு விழா என்பது, அதிமுக., மற்றும் பாஜ., கட்சிகள் சார்பில் நடத்தப்படும் விழா. சிறுகுறு தீப்பெட்டி உற்பத்தியாளர்களும், தொழிலாளர்களும் அதில் கலந்து கொள்ளப்போவதில்லை. தீப்பெட்டித் தொழில் அழிந்ததற்கு காரணமே மத்திய பாஜ., அரசின் ஜி.எஸ்.டி., வரிதான். தீப்பெட்டிக்கு 18 சதவீத ஜிஎஸ்டி., வரியை அறிவித்து தீப்பெட்டித் தொழிலை அழித்துவிட்டனர். லைட்டர் பயன்பாட்டால் தீப்பெட்டித் தொழில் பாதிப்பை சந்தித்து வருகிறது. தீப்பெட்டித் தொழில் என்பது கோடிக்கணக்கான ரூபாய் முதலீடு செய்து நடத்தக்கூடிய தொழில் அல்ல.. சிறிய அளவில் நடத்தக்கூடிய தொழில்.. ஆகவே, தீப்பெட்டித் தொழிலுக்கு ஜி.எஸ்.டி., வரியே இருக்கக் கூடாது என்றார்.
Tags : 2026 தேர்தலுக்கு பிறகுதான் விஜய்க்கு என்ன பலம் இருக்கிறது என்பது தெரியும் -சிபிஎம் மாநில செயலாளர் பெ.சண்முகம்
