சூரிய கிரகணம் – மதுரை மீனாட்சியம்மன் கோயில் நடை அடைப்பு.

by Editor / 25-10-2022 09:01:15am

சூரிய கிரகணம் இன்று தென்படுவதால் மதுரை மீனாட்சியம்மன் கோயில் மற்றும் ஆலய வளாகத்திலுள்ள 23 உப கோயில்களில் நடை அடைக்கப்படும் என கோயில் நிர்வாகம் தெரிவித்துள்ளது. சூரிய கிரகணம் இன்று மாலை 5.23 மணிக்கு ஆரம்பமாகி 6.23 மணிக்கு முடிவடைவதால் மதுரை மீனாட்சி சுந்தரேசுவரர் திருக்கோயில் மற்றும் அதன் உபகோயில்களில் இன்று காலசந்தி பூஜை காலத்தில், உச்சிகாலம், சாயரட்சை ஆகிய பூஜைகள் நடைபெற்று திருக்கோயில் நடை காலை 11.00 மணி முதல் இரவு 7.00 மணி வரை அம்மன் சுவாமி மூலஸ்தானத்தில் பலகனி கதவுகள் அடைக்கப்பட்டு நடை சாத்தப்படும்.

இந்த நேரத்தில் பொது மக்கள் அர்ச்சனை செய்யவோ, தரிசனம் செய்யவோ அனுமதி இல்லை. சூரிய கிரகணம் மத்திம காலத்தில் மாலை 5.51 மணிக்கு தீர்த்தம் கொடுக்கப்பட்டு, அம்மன் மற்றும் சுவாமிக்கு கிரகண கால அபிஷேகம் நடைபெறும். அதன் பின் அபிஷேகம் முடிவடைந்து சந்திரசேகரர் புறப்பாடு நடைபெறும்.

அதன் பின் இரவு 7 மணிக்கு நடை திறக்கப்பட்டு பக்தர்கள் தரிசனத்திற்கு அனுமதிக்கப்படுவார்கள். மேலும், கோலாட்ட உற்சவம், சாமி புறப்பாடு இன்று ஒரு நாள் மட்டும் இரவு 7 மணிக்குப் பின் நடைபெறும். இதேபோன்று இக்கோயில் நிர்வாகத்தில் உள்ள திருக்கோயில்களிலும் இதே நேரத்தில் நடை சாத்தப்பட்டு, நடை திறக்கப்பட்டும் என்றும் பூஜைகள் நடைபெறும் என்றும் தெரிவிக்கப்பட்டுள்ளது.