மார்ச் மாதத்திற்குள் மதுரை கோட்டத்தில் 90 சதவீத ரயில் பாதைகள் மின்மயமாக்கப்பட்டு விடும்.
மதுரை ரயில்வே கோட்டம் சார்பாக 74 வது குடியரசு தின விழா சிறப்பாக கொண்டாடப்பட்டது. மதுரை ரயில்வே காலனி செம்மண் திடலில் ரயில்வே கோட்ட மேலாளர் பத்மநாபன் அனந்த் ரயில்வே பிராந்திய ராணுவப்படையில் கர்னலாக இருப்பதால் ராணுவ உடையில் மூவர்ண தேசியக் கொடியை ஏற்றி மரியாதை செலுத்தினார். அவர் பேசும்போது, மதுரை ரயில்வே கோட்டம் கடந்த 9 மாதங்களில் ரூபாய் 800 கோடி வருமானம் ஈட்டியுள்ளது. இது சென்ற ஆண்டு வருமானமான ரூபாய் 510.35 கோடியை காட்டிலும் 57 சதவீதம் அதிகம் என்றார். ரயில்வே வாரியம் நிர்ணயித்த வருமான இலக்கான ரூபாய் 666.83 கோடியை காட்டிலும் 20 சதவீதம் அதிகமாகும். ஏப்ரல் முதல் டிசம்பர் வரை மதுரை கோட்டத்தில் ரயில்களில் 25 மில்லியன் பயணிகள் பயணித்துள்ளனர். கடந்த ஆண்டில் இதே காலத்தில் 9.2 மில்லியன் பயணிகள் மட்டுமே பயணித்துள்ளனர். ரயில் பயண சீட்டு வருமானம் ரூபாய் 502.05 கோடியை எட்டியுள்ளது. இது கடந்த ஆண்டு வருமானமான ரூபாய் 280.80 கோடியை காட்டிலும் 79 சதவீதம் அதிகம். சரக்கு போக்குவரத்தில் 2.20 மில்லியன் டன் சரக்குகள் கையாளப்பட்டுள்ளன. இது ரயில்வே வாரியம் நிர்ணயித்த இலக்கான 1.67 மில்லியன் டன்னை காட்டிலும் 32 சதவீதம் அதிகமாகும். கடந்த ஜூலை மாதத்தில் மட்டும் தூத்துக்குடி துறைமுகத்தில் இருந்து அதிகபட்ச அளவாக 2.2 லட்சம் டன் சரக்குகளை சரக்கு ரயில் மூலம் அனுப்பப்பட்டு ள்ளது. இதன் மூலம் எப்போதும் இல்லாத அதிகப்பட்ச வருமானமாக ரூபாய் 19.99 கோடி ஈட்டப்பட்டுள்ளது. கோட்ட வர்த்தக வளர்ச்சி அமைப்பின் சீரிய முயற்சியினால் 117 சரக்கு ரயில்களில் டிராக்டர்கள், 82 ரயில்களில் சுண்ணாம்புக்கல், 45 ரயில்களில் மரக்கரி, 433 ரயில்களில் ரசாயன உரங்கள், 12 ரயில்களில் சரளைக்கல்கள், 4 ரயில்களில் ஜிப்சம் ஆகியவை பல்வேறு நகரங்களுக்கு அனுப்பப்பட்டுள்ளது. மின்னணு ஏல முறை வாயிலாக விளம்பரம், வாகன காப்பகம், கழிப்பறை மேலாண்மை, உடைமைகள் காப்பகம், பார்சல் ரயில் பெட்டி குத்தகை, குளிர்சாதன ஓய்வறை ஒப்பந்தம் ஆகிய ஒப்பந்தங்கள் வாயிலாக ரூபாய் 33.97 கோடி வருமானம் ஈட்டப்பட்டுள்ளது. ரயில் கட்டணம் தவிர இதர வருமானம் ஈட்ட ரயில் நிலையங்களில் பூங்கொத்து விற்பனையகம், கதர் கிராம தொழில் பொருட்கள் விற்பனை ஆகியவற்றிற்கு ஒப்பந்தங்கள் வழங்கப்பட்டுள்ளன. தேனி - போடிநாயக்கனூர் அகல ரயில் பாதை பிரிவு ஜனவரி 2 அன்று ரயில்வே நிர்வாக வசதிக்காக துவக்கி வைக்கப்பட்டுள்ளது. அதேபோல கோவில்பட்டி - கடம்பூர் ரயில்வே பிரிவில் ஜனவரி 11 அன்று இரட்டை ரயில் பாதை சேவை துவக்கி வைக்கப்பட்டது. ரயில் பாதைகள் பலப்படுத்தப்பட்டு திருநெல்வேலி - திருச்செந்தூர் பிரிவில் மணிக்கு 70 கிமீ ஆக இருந்த ரயில்களின் வேகம் மணிக்கு 110 கிமீ ஆகவும், திருமங்கலம் - கடம்பூர், கங்கைகொண்டான் - திருநெல்வேலி, திருச்சி - புதுக்கோட்டை ஆகிய ரயில் பிரிவுகளில் மணிக்கு 90 கிமீ ஆக இருந்த ரயில்களின் வேகம் மணிக்கு 100 கிமீ ஆகவும், தட்டப்பாறை - மீளவிட்டான் ரயில் பிரிவில் மணிக்கு 75 கிமீ ஆக இருந்த ரயில்களின் வேகம் மணிக்கு 90 கிமீ ஆகவும் அதிகரிக்கப்பட்டுள்ளது. 10 ரயில் நிலையங்களில் 14 நடைமேடைகளின் உயரம் அதிகரிக்கப்பட்டுள்ளது. பயணிகளின் பாதுகாப்பிற்காக திருப்பரங்குன்றம், ஸ்ரீவில்லிபுத்தூர், அவனேஸ்வரம் போன்ற ரயில் நிலையங்களில் நடைமேம்பாலங்கள் உருவாக்கப்பட்டுள்ளன. மதுரை கோட்டத்தில் 76 சதவீத ரயில் பாதைகள் மின்மயாக்கப்பட்டுள்ளன. வருகிற மார்ச் மாதத்திற்குள் 90.5 சதவீத ரயில் பாதைகள் மின்மய ரயில் பாதையாக மாற்றப்பட்டு விடும். தொண்டு நிறுவனங்கள் உதவியுடன் திண்டுக்கல், பழனி, உடுமலைப்பேட்டை ரயில் நிலையங்களில் உயர்வகுப்பு தங்கும் அறைகளில் தாய்ப்பாலூட்டும் அறைகளும், பழனி ரயில் நிலையத்தில் சுத்திகரிக்கப்பட்ட குடிநீர் வசதியும், ஆண்டிபட்டி ரயில் நிலையத்தில் பூங்காவும் அமைக்கப்பட்டுள்ளது. தொண்டு நிறுவன உறுப்பினர்கள், தேசிய மாணவர் படை, தேசிய சேவை அமைப்பு சார்ந்த கல்லூரி மாணவ மாணவியர் பல்வேறு ரயில் நிலையங்களில் சுத்தம் சுகாதார பணிகளை மேற்கொண்டு உதவி புரிந்துள்ளனர். மதுரை, திருநெல்வேலி ரயில் நிலையங்களில் ரயில் பெட்டி இயற்கை கழிவறை விழிப்புணர்வு கண்காட்சி, சுத்தமான உணவு, சுத்தமான குடிநீர், சுழற்சி முறையில்லா பிளாஸ்டிக் பொருட்கள் தவிர்ப்பு விழிப்புணர்வு கண்காட்சிகள் ஆகியவை நடத்தப்பட்டன. மதுரை, திருநெல்வேலி பராமரிப்பு பணி மனைகள், மீளவிட்டான் ரயில் சரக்கு பெட்டி பணிமனை ஆகியவற்றிற்கு ஒருங்கிணைந்த மேலாண்மை தர மேலாண்மை சுற்றுச்சூழல் மேலாண்மை தொழில் பாதுகாப்பு மற்றும் உடல் நல மேலாண்மை ஆகியவற்றிற்கான தரச் சான்றிதழ்கள் பெறப்பட்டுள்ளன. இந்த ஆண்டில் இதுவரை 764 ரயில்வே ஊழியர்களுக்கு பதவி உயர்வு அளிக்கப்பட்டுள்ளது. 87 ரயில்வே ஓய்வூதியர்களின் குறைகளுக்கு தீர்வு காணப்பட்டுள்ளது. ரயில்வே ஊழியர் நல குறைபாடுகளை தீர்த்து வைக்க "தீர்வு" என்ற பெயரில் வாட்ஸ் அப் செயலி மூலம் குறை தீர்க்கும் முறை அறிமுகப்படுத்தப்பட்டுள்ளது. ஊழியர் நலம் சார்ந்த தகவல்களை எளிதாக பெற "களஞ்சியம்" என்ற இணையதளம் இன்று துவக்கி வைக்கப்படுகிறது என தெரிவித்தார். விழாவின் இறுதியில் ரயில்வே பள்ளி மாணவ, மாணவிகளின் கலை நிகழ்ச்சிகள் நடைபெற்றன. விழாவில் கூடுதல் கோட்ட ரயில்வே மேலாளர் தண்ணீரு ரமேஷ் பாபு, கோட்டை ஊழியர் நல அதிகாரி டி. சங்கரன், கோட்ட பாதுகாப்பு படை ஆணையர் வி.ஜே.பி. அன்பரசு ஆகியோர் கலந்து கொண்டனர்
Tags :
