பொதிகை, நெல்லை எக்ஸ்பிரஸ் ரயில்களில் ஏ.சி. பெட்டி அதிகரிப்பு நிறுத்தம்.தென்னக ரயில்வே அறிவிப்பு!
நெல்லை எக்ஸ்பிரஸ் மற்றும் பொதிகை எக்ஸ்பிரஸ் ரயில்களில் ஏ.சி. பெட்டிகளின் எண்ணிக்கையை அதிகரித்து, தூங்கும் வசதி கொண்ட 2-ம் வகுப்பு பெட்டிகளின் எண்ணிக்கையைக் குறைப்பதற்கான தனது அறிவிப்பை தென்னக ரயில்வே நிறுத்தி வைத்துள்ளது. இது தென்மாவட்ட பயணிகள் மத்தியில் பெரும் மகிழ்ச்சியை ஏற்படுத்தியுள்ளது.
தமிழகத்தின் தென்மாவட்டங்களான நெல்லை, தென்காசி மற்றும் தூத்துக்குடி ஆகிய பகுதிகளைத் தலைநகரான சென்னையுடன் இணைப்பதில் நெல்லை எக்ஸ்பிரஸ் மற்றும் பொதிகை எக்ஸ்பிரஸ் ரயில்கள் முக்கியப் பங்காற்றுகின்றன. நெல்லை சந்திப்பு-சென்னை எழும்பூர் இடையே நெல்லை எக்ஸ்பிரஸும், செங்கோட்டை - சென்னை எழும்பூர் இடையே பொதிகை எக்ஸ்பிரஸும் இருமார்க்கத்திலும் தினசரி இயக்கப்படுகின்றன. இவை ஒவ்வொன்றும் தலா 22 பெட்டிகளைக் கொண்ட ரயில்களாகும்.
முன்னதாக, வருகிற ஆகஸ்ட் மாதம் முதல் நெல்லை எக்ஸ்பிரஸ் மற்றும் பொதிகை எக்ஸ்பிரஸ் ரயில்களில் தூங்கும் வசதி கொண்ட 2-ம் வகுப்பு பெட்டிகள் ஒன்று குறைக்கப்பட்டு, அதற்குப் பதிலாக மூன்றடுக்கு ஏ.சி. பெட்டி இணைக்கப்படும் என்று தென்னக ரயில்வே அறிவிப்பு வெளியிட்டிருந்தது.
இந்த அறிவிப்பு வெளியானதுமே பயணிகள் மத்தியில் கடும் எதிர்ப்பு கிளம்பியது. 2-ம் வகுப்பு பெட்டிகளை ஒருபோதும் குறைக்கக் கூடாது என்றும், தேவைப்பட்டால் கூடுதல் ரயில்களை இயக்க வேண்டும் என்றும் பயணிகள் வலியுறுத்தினர். குறிப்பாக, தென்காசி ரயில் பயணிகள் சங்கத்தினரும் இந்த முடிவுக்குக் கடும் எதிர்ப்பு தெரிவித்து, ரத்து செய்யக்கோரி வலியுறுத்தினர்.
பொதிகை, நெல்லை எக்ஸ்பிரஸ் ரயில்கள் நெல்லை, தென்காசி மாவட்ட மக்களுக்கு மிக முக்கியமான ரயில் சேவை என்பதால், குறைந்த கட்டணத்தில் 2-ம் வகுப்பு பெட்டிகளில் பயணிக்கும் மக்கள் வெகுவாகப் பாதிக்கப்படுவார்கள் என்ற கவலை எழுப்பப்பட்டது.
இந்த நிலையில், பயணிகளின் கோரிக்கைகளை ஏற்று, தென்னக ரயில்வேயின் மதுரை போக்குவரத்துப் பிரிவு சார்பில் ஒரு புதிய அறிவிப்பு வெளியிடப்பட்டுள்ளது. அதில், "நெல்லை எக்ஸ்பிரஸ் மற்றும் பொதிகை எக்ஸ்பிரஸ் ரயில்களில் ஆகஸ்ட் மாதம் ஏ.சி. மற்றும் 2-ம் வகுப்பு பெட்டிகள் மாற்றம் செய்வதற்கான அறிவிப்பு ரத்து செய்யப்படுகிறது. தற்போது உள்ளது போல் இரண்டாம் வகுப்பு தூங்கும் வசதி பெட்டிகளில் எந்த மாற்றமும் செய்யப்படாமல் இந்த ரயில்கள் இயக்கப்படும்" என்று தெளிவாகக் குறிப்பிடப்பட்டுள்ளது
Tags : பொதிகை, நெல்லை எக்ஸ்பிரஸ் ரயில்களில் ஏ.சி. பெட்டி அதிகரிப்பு நிறுத்தம்.தென்னக ரயில்வே அறிவிப்பு!
