அக்டோபர் மாதத்திற்குள் 5ஜி சேவை-அமைச்சர் அஸ்வினி வைஷ்ணவ்
அக்டோபர் மாதத்திற்குள் 5ஜி சேவையை வழங்க இந்தியா தயாராகி வருகிறது என்று மத்திய தகவல் தொடர்பு, மின்னணுவியல் மற்றும் தகவல் தொழில்நுட்பத் துறை அமைச்சர் அஸ்வினி வைஷ்ணவ் வியாழக்கிழமை தெரிவித்தார்.
செய்தியாளர்களிடம் பேசிய வைஷ்ணவ், 5ஜி சேவைகள் அறிமுகப்படுத்தப்பட்ட பிறகு படிப்படியாக அதிகரிக்கப்படும் என்றும், அடுத்த இரண்டு அல்லது மூன்று ஆண்டுகளில் நாட்டின் அனைத்துப் பகுதிகளையும் சென்றடையும் என்றும் கூறினார்.
"5ஜி சேவைகளை விரைவாக வெளியிட திட்டமிட்டுள்ளோம். தொலைத்தொடர்பு ஆபரேட்டர்கள் அந்த வகையில் பணியாற்றி வருகின்றனர். அக்டோபர் மாதத்திற்குள் 5ஜி சேவைகளை தொடங்குவோம், அதன் பிறகு நகரங்களில் மேலும் விரிவாக்கப்படும். 5ஜி வழங்க வேண்டும் என்பது எங்கள் எதிர்பார்ப்பு. அடுத்த இரண்டு அல்லது மூன்று ஆண்டுகளில் நாட்டின் அனைத்துப் பகுதிகளையும் சென்றடையும். அது மலிவு விலையில் இருப்பதை உறுதி செய்வோம். இதனை விரிவுபடுத்த நகர்ப்புறம் மற்றும் கிராமப்புறங்களில் கவனம் செலுத்தப்பட்டு வருகிறது," என்று அவர் கூறினார்.
கடந்த வாரம், தொலைத்தொடர்பு சேவை வழங்குநர்களுக்கு ஸ்பெக்ட்ரம் ஒதுக்கீடு கடிதங்களை அரசாங்கம் வழங்கியது, அதே நேரத்தில் நாட்டில் 5ஜி சேவைகளை வெளியிடத் தயாராகுமாறு கேட்டுக் கொண்டது.
இந்த அலைக்கற்றை ஒதுக்கீட்டின் மூலம், அதிவேக 5ஜி தொலைத்தொடர்பு சேவைகளை வெளியிடுவதற்கான இறுதிக் கட்டத்தில் இந்தியா நுழைந்தது.
5ஜி என்பது ஐந்தாம் தலைமுறை மொபைல் நெட்வொர்க் ஆகும், இது ஒரு பெரிய அளவிலான தரவை மிக விரைவான வேகத்தில் அனுப்பும் திறன் கொண்டது. ஸ்பெக்ட்ரம் ஏலத்தில் ரிலையன்ஸ் ஜியோ, அதானி குழுமம், பார்தி ஏர்டெல் மற்றும் வோடபோன் ஐடியா ஆகிய நான்கு முக்கிய பங்குதாரர்கள் கலந்துகொண்டிருந்தனர்.
சமீபத்தில் முடிவடைந்த ஏலத்தில் இருந்து தொலைத்தொடர்பு துறை ரூ.1.50 லட்சம் கோடி மதிப்பிலான ஏலத்தைப் பெற்றுள்ளது.
5ஜி சேவைகள் 4ஜியை விட 10 மடங்கு வேகமாக இருக்கும் என்று எதிர்பார்க்கப்படுகிறது.
Tags :
