80 லட்சம் மோசடி இருவா் கைது
சேலம் மாவட்டம் மல்லூரைச் சோ்ந்தவா் மருத்துவா் கிருபாகரன் (40). கடந்த ஜனவரி மாதம் இவரது கைப்பேசிக்கு வாட்ஸ் ஆப்பில், பங்குச் சந்தையில் முதலீடு செய்தால் இரட்டிப்பு லாபம் பெறலாம் என வந்த தகவலை நம்பி பல்வேறு தவணைகளில் ரூ. 80. 50 லட்சம் முதலீடு செய்தாா். முதற்கட்டமாக முதலீடு செய்த போது ரூ. 1. 90 லட்சம் வரை லாபம் பெற்றுள்ளாா்.
அதைத்தொடா்ந்து அவருக்கு லாப பணம் எதுவும் வரவில்லை. இதனால் தாம் ஏமாற்றப்பட்டதை அறிந்த கிருபாகரன், சேலம் மாவட்ட காவல் கண்காணிப்பாளா் அலுவலகத்தில் புகாா் செய்தாா். அதன்பேரில் மாவட்ட காவல் கண்காணிப்பாளா் ஸ்ரீஅபிநவ் அறிவுரையின்படி சேலம் மாவட்ட சைபா் கிரைம் ஆய்வாளா் கைலாசம் தலைமையிலான தனிப்படையினா் வழக்குப் பதிவு செய்து விசாரித்தாா்.
விசாரணையில், பங்குச் சந்தையில் முதலீடு செய்தால் இரட்டிப்பு லாபம் பெற்று தருவதாகக் கூறி இருவா் ரூ. 80 லட்சம் மோசடி செய்துள்ளது தெரியவந்தது. சுமாா் நாடு முழுவதும் உள்ள 15 பேரின் வங்கிக் கணக்குகளில் அந்த பணம் பரிமாற்றம் செய்யப்பட்டிருப்பது தெரியவந்தது. மேலும் பண மோசடி செய்வதற்காக தங்களின் வங்கிக் கணக்குகளை வாடைக்கு விட்ட நபா்கள் குறித்தும் தெரியவந்தது. இதில் வங்கி கணக்குகளை வாடகைக்கு விட்டு பண மோசடிக்கு உடந்தையாக இருந்த இருவரை போலீஸாா் கைது செய்தனா். கேரளத்தைச் சோ்ந்த சைதலவி கூட்டலுங்கல் (50) என்பவா் வங்கிக் கணக்கில் ரூ. 38 லட்சம் பணம் பரிமாற்றம் செய்தது தெரியவந்தது. அதேபோல தில்லியைச் சோ்ந்த செளரவ் தாக்குா் (23) ரூ. 5 லட்சம் பணம் பரிமாற்றம் மூலம் மோசடி செய்தது தெரியவந்தது. இதையடுத்து இருவரையும் போலீஸாா் கைது செய்து சேலம் மத்திய சிறையில் அடைத்தனா். இதில் சைதலவவி கூட்டங்கல் மீது ஆந்திரம், குஜராத் போன்ற மாநிலங்களில் வழக்கு நிலுவையில் உள்ளது.
இதுதொடா்பாக மாவட்ட சைபா் கிரைம் காவல் ஆய்வாளா் கைலாசம் கூறுகையில், ‘பங்கு சந்தையில் முதலீடு செய்பவா்கள் பிறரின் வங்கிக் கணக்குகளை வாடகைக்கு பெற்று நூதன முறையில் மோசடியில் ஈடுபடுகின்றனா். சிலா் பணத்திற்காக ஆசைப்பட்டு வங்கிக் கணக்குகளை வாடைக்கு விட்டு மோசடிக்கு உடந்தையாக உள்ளனா். இப்படி வங்கி கணக்குகளை வாடகைக்கு விடுபவா்கள்தான் காவல்துறையில் சிக்கிக் கொள்கின்றனா். எனவே, பொதுமக்கள் யாரேனும் வங்கிக் கணக்கு விவரங்களை கேட்டால் தர வேண்டாம்’ என்றாா்.
Tags :
