மேலூர்  இருசக்கர வாகனத்தில் சென்றகாதலர்கள் மீது வாகனம் மோதியதில் இளைஞர் பலி - காதலி படுகாயம்.

by Staff / 17-08-2025 10:16:07am
மேலூர்  இருசக்கர வாகனத்தில் சென்றகாதலர்கள் மீது வாகனம் மோதியதில் இளைஞர் பலி - காதலி படுகாயம்.

மதுரை மாவட்டம் கொட்டாம்பட்டி ஒன்றியத்திற்கு உட்பட்ட பூதமங்கலம் ஊராட்சி பொட்டபட்டி என்ற கிராமத்தை சேர்ந்தவர் சதீஷ்(23), இவரும் அதே பகுதியைச் சேர்ந்த இளம் விதவையான ராகவி(23) ஆகிய இருவரும்  காதலித்து வந்துள்ளனர். இருவரும் தனியாக வீடு எடுத்து தங்கி வசித்து வந்ததாக கூறப்படுகிறது. இந்நிலையில்  இதற்கு பெண் வீட்டார் கடும் எதிர்ப்பு தெரிவிக்கவே, சதீஷ் கடந்த 14ஆம் தேதி மேலூர் மகளிர் காவல் நிலையத்தில் தனது மனைவி ராகவியை காணவில்லை என்று புகார் செய்துள்ளார்.

 அதனை அடுத்து ஒரே சமூகத்தைச் சேர்ந்த இரு தரப்பினரையும் மேலூர் மகளிர் காவல் நிலைய போலீசார் அழைத்து விசாரணை செய்துள்ளனர். இருதரப்பையும் சமாதானப்படுத்திய போலீசார் இருவரும் திருமணம் செய்து கொள்ள அறிவுறுத்தி  அனுப்பி வைத்துள்ளனர். 

 இந்நிலையில் விசாரணை முடிந்த கையோடு இருவரும் நேற்று நள்ளிரவு- 12 மணி அளவில் இருசக்கர வாகனத்தில் மதுரை- திருச்சி நான்கு வழிச்சாலையில் அய்யாபட்டி விளக்கு என்ற பகுதி அருகே சென்று கொண்டிருந்தபோது அடையாளம் தெரியாத வாகனம் மோதியதில் சதீஷ் சம்பவ இடத்திலேயே உயிரிழந்துள்ளார். ராகவி பலத்த காயங்களுடன் மேல் சிகிச்சைக்காக மதுரை அரசு ராஜாஜி மருத்துவமனையில் அனுமதிக்கப்பட்டுள்ளார். வாகன விபத்தில் சதீஷ் இறந்ததாக கூறப்படும் நிலையில் அவரது குடும்பத்தார் திட்டமிடப்பட்ட கொலை என்று புகார் செய்துள்ளனர்.


 

 

Tags : மேலூர்  இருசக்கர வாகனத்தில் சென்றகாதலர்கள் மீது வாகனம் மோதியதில் இளைஞர் பலி - காதலி படுகாயம்.

Share via