போட்டியின்றி தேர்வான அப்துல்லா ஸ்டாலினை சந்தித்து வாழ்த்து பெற்றார்
தி.மு.க. சார்பில் நாடாளுமன்ற மாநிலங்களவை உறுப்பினராக போட்டியின்றி தேர்ந்தெடுக்கப்பட்ட எம்.எம்.அப்துல்லா, முதலமைச்சர் மு.க.ஸ்டாலினை அவரது இல்லத்தில் சந்தித்து வாழ்த்து பெற்றார்.
தமிழக மாநிலங்களவை உறுப்பினர் (எம்.பி.) முகமது ஜான் மரணமடைந்ததைத் தொடர்ந்து அந்த காலியிடத்தை நிரப்புவதற்கான இடைத்தேர்தலை இந்திய தேர்தல் ஆணையம் அறிவித்தது. இந்த தேர்தலுக்கான வேட்புமனு தாக்கல் கடந்த ஆகஸ்டு 24-ந் தேதி தொடங்கி 31-ந் தேதி முடிவடைந்தது.
தி.மு.க. வேட்பாளர் மு.முகமது அப்துல்லா வேட்புமனு தாக்கல் செய்தார். இந்த இடைத்தேர்தலில் மொத்தம் 4 வேட்புமனுக்கள் தாக்கல் செய்யப்பட்டு இருந்தன. இந்த நிலையில் 1-ந் தேதி வேட்புமனுக்கள் பரிசீலனை நடைபெற்றது. அதைத் தொடர்ந்து தேர்தல் நடத்தும் அதிகாரி சீனிவாசன் அதுதொடர்பான அறிவிப்பை வெளியிட்டார். அதில், தி.மு.க. வேட்பாளர் மு.முகமது அப்துல்லாவின் வேட்புமனு செல்லத்தக்கது என்று அறிவிக்கப்படுகிறது. சுயேச்சை வேட்பாளர்களான ந.அக்னி ஸ்ரீராமச்சந்திரன், கு.பத்மராஜன், கோ.மதிவாணன் ஆகியோரின் வேட்புமனுக்கள் நிராகரிக்கப்பட்டன என்று கூறப்பட்டு இருந்தது.
வேட்புமனுவை திரும்பப்பெறுவதற்கு கடைசி நாள் 3-ந் தேதியாகும் (நேற்று). வேட்புமனுவை திரும்பப்பெறும் நேரமான நேற்று பிற்பகல் 3 மணி வரை வேட்புமனு திரும்பப்பெறப்படவில்லை என்பதால், தி.மு.க. வேட்பாளர் மு.முகமது அப்துல்லா போட்டியின்றி மாநிலங்களவை உறுப்பினராக தேர்வு செய்யப்பட்டதாக தேர்தல் நடத்தும் அதிகாரி சீனிவாசன் அறிவித்தார்.
இதுதொடர்பாக அவர் வெளியிட்ட அதிகாரபூர்வ அறிவிப்பில், ‘தி.மு.க. வைச் சேர்ந்த மு.முகமது அப்துல்லா, மாநிலங்களவை உறுப்பினராக முறையாக தேர்ந்தெடுக்கப்பட்டுள்ளார்’ என்று கூறப்பட்டுள்ளது.
அதைத் தொடர்ந்து மாநிலங்களவை உறுப்பினராக தேர்ந்தெடுக்கப்பட்டதற்கான சான்றிதழை மு.முகமது அப்துல்லாவிடம் நேற்று சட்டசபை செயலாளர் அலுவலகத்தில் வைத்து சீனிவாசன் வழங்கினார்.
இந்த நிகழ்ச்சியில் அமைச்சர்கள் கே.என்.நேரு, பொன்முடி, ஐ.பெரியசாமி, எ.வ.வேலு மற்றும் அமைச்சர்கள், உதயநிதி ஸ்டாலின் எம்.எல்.ஏ. உள்ளிட்டோர் பங்கேற்றனர்.
பின்னர் மு.க. ஸ்டாலினை சந்தித்து முகமது அப்துல்லா வாழ்த்து பெற்றார்.
Tags :
