பிரதமர் தலைமையில்  நடந்த  ஆய்வுக் கூட்டத்தை புறக்கணித்த மம்தா 

மேற்கு வங்க முதல்வர் மம்தா பானர்ஜி பிரதமர் நரேந்திர மோடியுடனான யாஸ் புயல் குறித்த சந்திப்புக்கு 30 நிமிடங்கள் தாமதமாக வந்தார். ஆதாரங்களின்படி, மேற்கு மிட்னாபூரில் உள்ள கலைகுண்டா விமானத் தளத்தில் மம்தா கூட்டத்தில் கலந்து கொண்டார். இருப்பினும், அவர் பிரதமரைக் காத்திருக்க வைத்துள்ளார். இந்த சந்திப்பில் மேற்கு வங்க ஆளுநர் ஜகதீப் தங்கர், மாநில சட்டசபை எதிர்கட்சித் தலைவர் சுவேந்து ஆதிகாரி மற்றும் பிற அதிகாரிகள் கலந்து கொண்டனர்.
மறுஆய்வு கூட்டத்தில் நுழைந்த மம்தா, யாஸ் புயல் தாக்கம் தொடர்பான ஆவணங்களை அதிகாரிகளிடம் ஒப்படைத்தார். பின்னர், தனக்கு வேறு கூட்டங்கள் வரிசையாக அமைக்கப்பட்டு இருப்பதாகக் கூறிவிட்டு கூட்ட அரங்கிலிருந்து வெளியேறினார்.“மாநில நலனுக்காக பிரதமர் நடத்தும் இந்த மறு ஆய்வுக் கூட்டத்தில் முதல்வர் மற்றும் அதிகாரிகள் கலந்துகொண்டு மாநிலத்தின் தேவையை எடுத்துரைப்பது அவசியம். மோதல் நிலைப்பாடு மாநில நலனுக்கு உதவாது. முதல்வர் மற்றும் அதிகாரிகள் பங்கேற்காதது அரசியலமைப்பு அல்லது சட்டத்தின் ஆட்சிக்கு ஒத்ததாக இல்லை.” என ஆளுநர் தங்கர் ஒரு ட்வீட்டில் கூறினார்.
எனினும், கூட்டத்தில் இருந்து வெளியேறுவதற்கு முன்பு பிரதமர் மோடியின் அனுமதி பெற்றுத்தான் வெளியேறியதாக மம்தா பின்னர் தெளிவுபடுத்தினார்.“பிரதமர் கூட்டத்திற்கு அழைப்பு விடுத்தார், நான் திகாவில் ஒரு கூட்டத்தில் கலந்துகொள்ள வேண்டியிருந்தது. நான் கலைகுண்டாவுக்குச் சென்று பிரதமரிடம் அறிக்கை கொடுத்தேன். திகா மற்றும் சுந்தர்பன் மேம்பாட்டுக்கு தலா ரூ 10,000 கோடி என மொத்தம் ரூ 30,000 கோடி தருமாறு கேட்டுக் கொண்டேன். எனது அதிகாரிகள் கூட்டத்தில் கலந்து கொண்டனர். நான் அவருடைய அனுமதியை பெற்று வெளியேறினேன்.” என மம்தா பானர்ஜி கூறியுள்ளார்.
“நாளை நான் பாதிக்கப்பட்ட பகுதிகளை வான்வழி ஆய்வு செய்வேன்.” என்று அவர் மேலும் கூறினார்.
முன்னதாக, பிரதமர் மோடி மேற்கு வங்காளத்திலும் ஒடிசாவிலும் வான்வழி ஆய்வு நடத்தினார்.
முன்னதாக, யாஸ் சூறாவளியால் எழும் நிலைமையை ஆய்வு செய்ய பிரதமர் மோடி ஒடிசா மற்றும் மேற்கு வங்கத்திற்கு விஜயம் செய்தார். ஒடிசாவின் பத்ராக் மற்றும் பலேஸ்வர் மாவட்டங்கள் மற்றும் மேற்கு வங்காளத்தின் பூர்பா மெடினிபூர் ஆகிய இடங்களில் புயலால் பாதிக்கப்பட்ட பகுதிகளில் வான்வழி ஆய்வை மேற்கொண்டார்.புவனேஸ்வரில், மேற்கொள்ளப்படும் நிவாரணம் மற்றும் மறுவாழ்வு நடவடிக்கைகள் குறித்து மறுஆய்வு செய்யும் கூட்டத்திற்கு பிரதமர் தலைமை தாங்கினார்.யாஸ் சூறாவளியால் அதிகபட்ச சேதம் ஒடிசாவில் நிகழ்ந்ததாகவும், மேற்கு வங்கம் மற்றும் ஜார்க்கண்டின் சில பகுதிகளும் பாதிக்கப்பட்டுள்ளன என்றும் பிரதமருக்கு விளக்கமளிக்கப்பட்டது.உடனடி நிவாரண நடவடிக்கைகளுக்கு ரூ 1000 கோடி நிதி உதவி அறிவித்துள்ள பிரதமர் மோடி, ஒடிசாவுக்கு உடனடியாக ரூ 500 கோடி வழங்கப்படும் என்றும் சேதத்தின் அடிப்படையில் மீதத்தொகை வெளியிடப்படும் எனத் தெரிவித்துள்ளார்.

Tags :

Share via