மதுரை மாநகராட்சியில் ரூபாய் 150 கோடி ரூபாய் மோசடியில் இரண்டு முக்கிய அதிகாரிகள் கைது.
மதுரை மாநகராட்சியில் ரூ.150 கோடிக்கும் மேற்பட்ட சொத்து வரி மோசடி விவகாரம் பெரும் அதிர்வலை ஏற்படுத்தி, அரசியல் மற்றும் நிர்வாக ரீதியாக பெரும் தாக்கத்தை ஏற்படுத்தியுள்ளது.
தனியார் வணிகக் கட்டடங்களுக்கு குறைந்த சொத்து வரி விதிக்கப்பட்டு அரசுக்கு ரூ.150 கோடி வருமான இழப்பு ஏற்படுத்திய இந்த முறைகேடில், தற்போது வரை முன்னாள் உதவி ஆணையர் உட்பட 8 அதிகாரிகள் கைது செய்யப்பட்டுள்ளனர்.
மேலும், முதல்வர் மு.க.ஸ்டாலினின் உத்தரவின் பேரில், மாநகராட்சியில் பணியாற்றிய 5 மண்டலத் தலைவர்கள் மற்றும் 2 நிலைக் குழுத் தலைவர்கள் பதவியை ராஜினாமா செய்துள்ளனர். இந்த நடவடிக்கைகள், திமுக தலைமையையே கடும் நெருக்கடிக்குள்ளாக்கியுள்ளன.
தற்போது இந்த விவகாரம் துணை முதல்வர் உதயநிதி ஸ்டாலின் நேரடிக் கண்காணிப்பில் விசாரணை செய்யப்பட்டு வருகிறது.
இந்த நிலையில், இந்த வரி விதிப்பு மோசடியில் முக்கிய மூளையாக செயல்பட்டு வந்த கணினி ஆபரேட்டர்களான ரவி மற்றும் பாலாஜி ஆகிய இரண்டு அதிகாரிகளை மத்திய குற்றப்பிரிவு போலீசார் இன்று கைது செய்தனர்.
இதில் பணியிடமாறுதல் பெற்று ரவி ராமநாதபுரம் மாவட்டத்தில் பணிபுரிந்து வந்த நிலையில் மத்திய குற்றப்பிரிவு போலீசார் ராமநாதபுரம் சென்று அவரை கைது செய்தனர்.
இதன் தொடர்ச்சியாக நேற்று மேலும் நான்கு ஊழியர்கள் மீது நடவடிக்கை எடுக்கப்பட்டுள்ளது. இதில், பில் கலெக்டர் காளிமுத்து பணியிடை நீக்கம் செய்யப்பட்டுள்ளார். மேலும், ஒப்பந்த ஊழியர்களான பாலமுருகன், நாகராஜன் மற்றும் மகா பாண்டியன் ஆகியோர் பணிநீக்கம் செய்யப்பட்டுள்ளனர்.
ஏற்கனவே கடந்த வாரத்தில் வருவாய் உதவியாளர்களான கண்ணன், ராமலிங்கம், பிலிக்ஸ் ராஜா மாணிக்கம், ரவி, மாரியம்மாள், ஆதிமூலம் மற்றும் கருணாகரன் ஆகிய ஏழு பேர் பணியிடை நீக்கம் செய்யப்பட்டிருந்தனர்.
தொடர்ந்து நடைபெறும் இந்த விசாரணைகளில் 55 நபர்களுக்கு மேல் தொடர்பு உள்ளது என கூறப்படும் நிலையில் தொடர்ச்சியாக விசாரணை விரிவாக்கப்பட்டு, கூடுதல் சட்ட நடவடிக்கைகள் மேற்கொள்ளப்படலாம் என எதிர்பார்க்கப்படுகிறது.
Tags : Two key officials arrested in Madurai Corporation fraud worth Rs 150 crore
